Triumfi spektakolar i “kantonit shqiptar” të Zvicrës kundër Serbisë përhapi një valë emocioni, jo prej tifozi, por prej patriotizmi. Ishte një ndeshje si në Kolose, mes gladiatorëve shqiptarë dhe atyre serbë, dhe oshtima e triumfit shqiptar fluturoi bashkë me shpalosjen e Shqiponjës nga Xhaka dhe Shaqiri duke shkundur gjithë Serbinë.
Por, mbushja e gazetave dhe portaleve me lajme mbi këtë triumf duket se nuk ka lënë hapësirë as për fushatën e llogaridhënës së Ramës, as për makijazhet e biçikletave dhe sheshit-qenef të Erjon Velisë. Ky triumf shqiptar duket se ka ndalur makinerinë propagandistike Rama-Veliaj.
Por, ata s’e durojnë që atdhedashuria apo ndjenjat patriotike të mbysin propagandën e tyre. Ky çift korruptiv është zënë kaps dhe për të zmbrapsur Xhakën dhe Shaqirin, portalet e majta kanë filluar të nxjerrin njëfarë krimineli me emrin Izet Haxhia dhe janë mbushur me fake-news-e me ribotime të lajmeve pro çiftit Rama-Veliaj, duke u bashkuar kështu, në një farë mënyrë, në aradhet e sulmeve të medieve serbe.
Ngecja e ingranazheve propaganduese të dyshes Rama-Veliaj flet për natyrën korruptive dhe kriminale të saj, por edhe brishtësinë e saj për shkak të mungesë së të vërtetave. Pra, mjafton një goditje topi në rrjetën e Serbisë për të kuptuar sesa shpejt bie propaganda apatride Rama-Veliaj, bashkë me propagandën anti-shqiptare të Serbisë.
