Kur po mbushen 5 vjet nga koha që Edi Rama është kryeqeveritari i Shqipërisë, figura e tij si kryeministër po njihe përherë e më shumë në qarqet e diplomacisë europiane. Sikundër dihet, Rama me formim anarkisti, nuk ka pretenduar kurrë se mund të ishte një kryeministër i duhur për Shqipërinë, porse një propagandë e gjithanshme bëri që Ramën ta vlerësonin nga fasada e jo nga brendia. Rama ka besuar se suksesi i brendshëm në mashtrime kolektive në Shqipëri mund të ishte i tillë edhe në Europë. Pavarësisht investimit të madh që Rama ka bërë gjithë këto vite në këtë drejtim, tashmë Europa i ka njohur mirë trurin dhe bëmat e tij. Propaganda e Ramës si sistem drejtimi, bëri shumë shpejt efektin e kundërt, e zhvlerësoi shpejt atë. Në një vend të zhytur si asnjëherë tjetër në prodhimin e lëndëve narkotike, që eksporton kriminalitetit si kurrë më parë, ku pastrohen paratë në format më të njohura të mafies, Europa sigurisht nuk e ka të vështirë t’i njohë vetitë e vërteta të Ramës. Siç edhe është bërë i njohur, Rama ka mbrojtur ministrat e tij të brendshëm nga lidhjet që ata kishin me botën e krimin. Saimir Tahiri ishte modeli i qeverisjes së tij, qeveritari që ngriti modelin nepotik e të kriminalizuar në Policinë e Shtetit. Vetë Rama i dha akses emërimeve të elementit kriminal në posta të larta drejtuese. Europa nuk e kishte të vështirë të njihte mirë trurin dhe për rrjedhojë bëmat e Ramës.