Delegacioni i Bashkimit në Tiranë, në veçanti ambasadorja Vlahutin, gjatë gjithë kohës për çdo gjë të mundshme kanë pasur reagimet e tyre për zhvillimet në Shqipëri.  Por për një gjë kanë heshtur dhe nuk kanë thënë asnjë fjalë, për shembjen e Teatrit Kombëtar.

Në një shkrim të botuar në exit.al thuhet se përtej elementëve të qartë korruptiv dhe dëmit të mëtejshëm që veprime të tillë i bëjnë plotësimit të kushtit të luftës kundër korrupsionit, Ligji për shembjen e Teatrit Kombëtar bie ndesh direkt me detyrimet që ka Shqipëria në kuadër të Marrëveshjes së Stabilizim-Asociimit (MSA), që përbën kuadrin rregullues ndërmjet vendit tonë dhe BE-së.

“Nenet 71 dhe 74 të MSA-së parashikojnë dy parime themelore për lidhjen e kontratave publike nga qeveria shqiptare, pikërisht konkurrencën e lirë dhe mos-diskriminimin. Këto parime janë, gjithashtu, të konfirmuara gjërësisht nga jurisprudenca e Gjykatës Evropiane të Drejtësisë, ndër të tjera, përmes vendimit C-324/98 “Telaustria Verlags GmbH and Telefonadress GmbH v. Telekom Austria AG” të 7 dhjetorit 2000. Projektligji për prishjen e godinës aktuale dhe ndërtimin e një godine të re për Teatrin Kombëtar përcakton në mënyrë eksplicite, në nenet 6 dhe 8 të tij, kompaninë private me të cilën do të negociohet dhe lidhet kontrata për ndërtimin e teatrit të ri. Kjo kompani, është përzgjedhur në mënyrë arbitrare, pa asnjë proces që u ka dhënë mundësi të marrin pjesë apo të konkurojnë për këtë shërbim kompanive të tjera”, shuhet në shkrimin e botuar në exit.al.