Deputeti i PS-së Gjetan Gjetani ka folur për ‘Fax News’ pas vendimit të kryeministrit Rama për ta përjashtuar nga grupi parlamentar i PS-së pasi kritikoi punën e policisë në Kurbin.

Gjetan Gjetani ka thënë për ‘Fax News’ se pavarësisht vendimit të Ramës për ta përjashtuar, ai nuk largohet nga Partia Socialiste.

“Unë kam qenë dhe mbetem socialist”, tha ai.

Por deputeti i Kurbinit ritheksoi edhe njëherë qëndrimin e tij për punën e policisë në Kurbin, që sipas tij lë shumë për të dëshiruar dhe se administrata shtetërore ka nevojë për ndryshim.

Deputeti tha se siguria në vend po rrezikohet dhe krimi nuk po ndëshkohet. Ai u shpreh se shqetësimet e tij ia kishte bërë të ditura edhe ministrit të Brendshëm por nuk ishin marrë masa.

“Këtë shqetësim ia kam paraqitur edhe zotit ministër, për fat të keq nuk ka marrë asnjë masë për sigurinë. Nga ana e policisë nuk po merren as masa parandaluese, as masa zbuluese”, tha ai

Gjithashtu ai u shpreh se do të kërkonte interpelancë në Kuvend për punën e policisë.