Edi Ramës i duhet në krye të Prokurorisë së Përgjithshme një njeri i besuar dhe vegël për të mbyllur skandalet e qeverisë dhe deputetëve të tij të lidhur me botën e krimit. Këtë ai po e arrin shumë mirë me Arta Markun, Prokuroren që e miratoi me forcën e kartonit ën Parlament edhe pse nuk i ishte nënshtruar vettingut dhe që u tha se do të jetë e përkohshme deri në ngritjen e KLP-së. Por kjo përkohësia e socialistëve qenka pa limit.
Që të pengojë ngritjen e KLP-së, Rama ka përdorur personat e futur në komisionet e vettingut. Aq shumë u shfaqën disa prej tyre sa me urdhër të Ramës nxorën të pastër kryeprokuroren Arta Marku për të cilën ONM tha se është e paaftë profesionalisht, dhe gjithashtu me urdhër u rrëzuan shumë prej atyre prokurorëve dhe gjyqtarëve që Ramës i kanë dalë pengesë në karrierën e tij politike.
Komisioni i Vetingut ka shkarkuar nga detyra prokurorin e Apelit të Durrësit, njëkohësisht kandidat për Këshillin e Lartë të Prokurorisë, Bujar Hoti, duke sjellë në këtë mënyrë bllokimin zyrtar të ngritjes së strukturës përgjegjëse për krijimin e SPAK dhe zgjedhjes së Prokurorit të Përgjithshëm.
Këshilli i Lartë i Prokurorisë (KLP) përbëhet, ndër të tjerë, edhe nga dy prokurorë Apeli. Në fillim të procesit, kandiduan 4 prokurorë për këto dy vende. Por, pas procesit të Vetingut, tre prej tyre u rrëzuan, e konkretisht; Besa Nikëhasani nga Prokuroria e Apelit Shkodër, Luan Kaloçi nga Apeli Tiranë dhe së fundmi, Bujar Hoti, nga Apeli Durrës. I vetmi nga prokurorët e Apelit, kandidatë për KLP, që ka kaluar fazën e parë të Vetingut është Arben Dollapaj, i cili ka emërimin në Shkodër.
Në këtë kushte, Këshilli i Lartë i Prokurorisë gjendet në situatën që është prej dy muajsh edhe Këshilli i Lartë Gjyqësor, tërësisht i bllokuar.
Këshilli i Lartë i Prokurorisë është një prej institucioneve të reja të parashikuara nga Reforma në Drejtësi. Ky Këshill do të jetë përgjegjës për karrierën e prokurorëve, promovimin, masat disiplinore dhe shkarkimin e tyre.
Gjithashtu, KLP ka dy funksione shumë të rëndësishme-ai është përgjegjës për përzgjedhjen e prokurorëve që do të jenë pjesë e Strukturës së Posaçme Antikorrupsion (SPAK). Në bazë të dispozitave ligjore, çdo prokuror që do të kandidojë për të qenë pjesë e njësisë më të rëndësishme anti-korrupsion, duhet të marrë aprovimin e Këshillit të Lartë të Prokurorisë.
Krijimi i SPAK-ut ishte qëllimi final i miratimit të Reformës në Drejtësi. Kjo njësi e specializuar hetimore do të jetë përgjegjëse për hetimin e rasteve të korrupsionit dhe përfshirje në krim të organizuar të zyrtarëve të lartë shtetërorë. Pra, praktikisht, do të jetë struktura, rezultatet e së cilës do të ndihmojnë në integrimin e Shqipërisë drejt Bashkimit Europian.
Për shkak të kompetencës shumë të rëndësishme, analistë dhe politologë të ndryshëm shprehin dyshimin se vonesa në krijimin e SPAK rrjedh nga mungesa e vullnetit politik, sidomos atij qeveritar. Të njëjtët zëra shprehin dyshimin se qeveria po e arrin të vonojë krijimin e SPAK-ut, duke ndikuar tek Komisioni i Vetingut, i cili, si rregull, duhet të jetë i pavarur.
Vonesa në krijimin e Këshillit të Lartë të Prokurorisë sjell si rrjedhojë edhe zgjedhjen e Prokurorit të Përgjithshëm. Sipas dispozitave kushtetuese dhe ligjore, Prokurori i Përgjithshëm zgjidhet për një mandat 7-vjeçar nga Parlamenti, në bazë të tre kandidaturave të propozuara nga Këshilli i Lartë i Prokurorisë. Pra, mungesa e KLP-së passjell edhe mungesën e procedurave për zgjedhjen e Prokurorit të Përgjithshëm kushtetues.
Aktualisht, institucioni i Akuzës drejtohet nga Prokurorja e Përgjithshme e Përkohshme, Arta Marku. Kjo e fundit u zgjodh në detyrë në Dhjetor 2017, vetëm me votat e maxhorancës socialiste, në bazë të një procedurë shumë të dyshimtë ligjore.
