Kreu i Shtetit, Ilir Meta duhet që ditën e sotme të vendosë nëse do të dekretojë Sandër Lleshin si ministër të Brendshëm.

Meta e ka bërë të qartë, se për të çuar drejt Ministrisë së Brendshme, pengesa e vetme që duhet të kalohet është që ai të plotësojë Kushtetutën.

Ndërkohë, një ditë më parë Presidenti i deklaroi  se e njeh shumë mirë Kushtetutën e vendit në lidhje me dekretimin e ministrave dhe asnjë lloj presioni nuk mund të ndikojë tek ai për të shkelur Kushtetutën.

“Që ditën që kam pranuar këtë detyrë, e cila është detyra e lartë në vendin tonë dhe kam vënë dorë mbi Kushtetutë kam marrë përsipër të gjithë përgjegjësitë për të respektuar Kushtetutën. Për rastin konkret është krijuar një situatë, por jo nga mua. Jam i bindur që kam vepruar në interes të respektimit të Kushtetutës dhe interesit publik dhe kam për të gjitha përpjekjet e mia për të dhënë një zgjidhje të drejtë. Çështja e emërimit të një ministri, është një çështje që kërkon bashkëpunimin e tre institucioneve, Kryeministrit, Presidentit dhe Kuvendit”, tha Meta mbrëmjen e së enjtes në emisionin ‘Open’ të Eni Vasilit.

Po ashtu, ditën e djeshme Kreu i Shtetit është shprehur se mund të jetë diçka shumë e lehtë që të firmosë që nxjerrë në lirim një gjeneral, pasi nëse niset si praktikë, mundet që ushtria jonë të ngelet pa drejtues.

“Në rastin në fjalë, sepse në qoftë se po themi, le të marrim një rast kur të gjithë gjeneralët sot gjejnë një vend pune, ku marrin rroga dy-tre herë më të larta se sa ajo që kanë, edhe mund të gjejnë në sektorin privat, sepse që të jesh gjeneral do të thotë të kesh disa aftësi të veçanta, dhe lënë ushtrinë, praktikisht ushtria ngelet vetë. Presidenti individualisht secilit do t’ia pranojë apo do t’ia firmosë këtë kërkesë për t’u liruar apo për të dalë në rezervë nga ushtria, por do të ngelet ushtria pa komandë. Kështu që kjo është arsyeja që shteti përveç Kushtetutës ka edhe ligjet ku këtë administrim të kësaj situate ia beson përveç ministrisë së Mbrojtjes, edhe Shtabit të Përgjithshëm.”, the Presidenti Meta.

Kjo është hera e dytë që kryeministri Edi Rama çon për dekretim emrin e Lleshit dhe më herët Meta kishte thënë se do të respektonte afatin e përcaktuar në Kushtetutë.