Qytetarë nga i gjithë vendi janë duke vërshuar në orët e para të mëngjesit drejt Tiranës me mjetet e tyre ose me autobuzë për t’u bashkuar në një protestë kombëtare përpara Kryeministrisë.

Por, Policia e Shtetit në kuadrin e masave që ka deklaruar prej dy ditësh se po merr "për mbarëvajtjen e protestës së njoftuar", ka nisur të shkaktojë tensionet e para. 

Mësohet se në Kryebushat të Shkodrës, Policia ka fotografuar listën e udhëtarëve që po nisen drejt Tiranës, ç’ka i ka irrituar qytetarët dhe ka ndezur indinjatën e tyre.

Policia njoftoi të premten se " është e angazhuar tërësisht për marrjen e masave për mbarëvajtjen e protestës së njoftuar nga subjektet politike të opozitës, për datën 16 shkurt 2019, si një detyrim ligjor dhe i natyrshëm i saj, për mbështetjen e të drejtës së organizmit dhe protestave paqësore të qytetarëve."

Policia tha se "përveç deklaratave dhe retorikës së ndezur politike dhe thirrjeve për dhunë, të artikuluara nga disa përfaqësues të politikës dhe medias, ka administruar edhe informacione se persona të caktuar, me rekorde kriminale apo të dënuar më parë për vepra të rënda penale, janë përgatitur për të ushtruar dhunë në protestën e datës 16 shkurt 2019, të organizuar nga Partia Demokratike. Në interes të mbarëvajtjes së protestës dhe të sigurisë së pjesëmarrësve në të, dhe të qytetarëve të tjerë, Policia e Shtetit ri-përsërit thirrjen drejtuar organizatorëve, që të distancohen nga zërat që inkurajojnë dhunë, si dhe nga personat me rekorde të rënda kriminale."