Ndërkohë që burokracia diplomatike ndërkombëtare vazhdon që të jetë e ngurtë dhe më së shumti në krah të qeverisë, për krizën e rëndë politike që po përjeton Shqipëria, mediat e huaja me intesitet po kthejnë sytë nga problemet reale në vendin tonë, si krimi i organizuar, vjedhjet e zgjedhjeve, pastrimi i parave dhe trafiqet ndërkombëtare. Nga Italia, në Gjermani, Spanjë, SHBA e Francë, medium të rëndësishme po i japin gjithnjë e më shumë rëndësi kolapsit, ku e ka future vendin qeveria Rama.

Së fundmi edhe rrjeti i madh ndërkombëtar televiziv, “Al Jazeera”, i ka kushtuar një reportazh të gjerë protestave të opozitës. Gazetarët që kanë përgatitur materialin, zbulojnë se vendi është zhytur në varfëri, korrupsion dhe paqëndrueshmëri politike. Autori i materialit, gazetari John Psaropoulos, raporton se ekziston perceptimi se qeveria socialiste e Edi Rama ka përqafuar interesa të veçanta, dhe sidomos tregtinë ilegale të drogës, e cila është përhapur masivisht në Shqipëri.

Në pasazhin kur flet për kryetarin e Partisë Demokratike, Lulzim Basha, në këtë reportazh theksohet se vendimi për djegien e mandateve, erdhi vetëm pasi opozita u injorua nga mazhoranca.

“Ndryshimet që propozuam u hodhën poshtë pa diskutim. Sa herë që ministrat u thirrën për të raportuar para komisioneve parlamentare, ata refuzuan”, tha Basha për Al Jazeera.

Gjithashtu një minutazh të konsiderueshëm bnë këtë material zë edhe blerja e votave nga kjo qeveri në bashkëpunim me krimin e organizuar.

“OSBE, e cila monitoron zgjedhjet shqiptare, tha se ka pasur intimidime të personave gjatë votimeve, numërim të dyfishtë dhe mashtrime në votim. Por të gjitha partitë pranuan rezultatin dhe Bashkimi Evropian (BE) nuk e vuri në dyshim atë”, shkruhet në artikull.

Në këtë reportazh theksohet gjithashtu, se Shqipëria është shndërruar në vend tranzit të drogave të forta drejt vendeve të Bashkimit Europian, ndërsa shtohet se papunësia është mbi 13% dhe se shumë persona po përpiqen të largohen, ligjërisht apo ilegalisht, në vend që të mbeten në një treg pune që ata e konsiderojnë politikisht të pjerrët.