Shqipëria duhet të sigurojë kushtet e duhura themelore për investitorët potencialë, si shqiptarë ashtu edhe të huaj, ku më të rëndësishmet janë siguria, transparenca dhe një administratë mirëfunksionale, efektive dhe jo e korruptuar.

Ambasadorja gjermane në Shqipëri, Susanne Schutz, thotë në një intervistë ekskluzive për “Monitor” se sipërmarrjet gjermane, pra ato më potenciale, por edhe investitorët tashmë aktivë në tregun shqiptar, ankohen shpesh për një politikë informacioni dhe transparencë të mangët, për shembull në lidhje me tenderët publikë dhe gjithashtu, marrëdhenie pronësore të paqarta në objekte potenciale investimi.

Schutz thotë se marrëdhëniet tregtare mes shqipërisë dhe Gjermanisë janë më të ulta në krahasim me shtetet e tjera të rajonit, pasi këto të fudnit kanë pasur lidhje më të hershme me shtetin perëndimor.

Ajo shton se sektorët kryesorë ku investitorët gjermanë kanë shprehur interes janë turizmi, energjia e gjelbër, por edhe bujqësia dhe sektori i shërbimeve.

Ambasadorja shprehet se reforma në drejtësi mund të kontribuojë në mënyrë thelbësore në rritjen e atraktivitetit të Shqipërisë si destinacion investimi.