Kryebashkiakja e Prrenjasit, Miranda Rira, ka sfiduar kryeministrin Edi Rama, pasi ky i fundit në një takim tha se pas 30 qershorit, ajo do të ketë më shumë të merret me beben.

Rira është bërë nënë para disa ditësh, por Rama nuk ka kursyer batutat në drejtim të saj, duke shprehur bindjen se në zgjedhjet vendore kjo bashki do të drejtohet nga kandidatura e socialistëve.

Por Rira ka deklaruar rikandidimin e saj në zgjedhje, nëse LSI do të marrë pjesë në proces.

“Ajo që më shqetëson mua sot nuk është se çfarë mendon Rama për gratë, për fitoren time në Qershor, apo për fëmijët e mi, por më shqetëson çfarë ai mendon për fëmijët e Prrenjasit. Edhe pse jemi në Prill, bashkia Prrenjas është e vetmja bashki në Republikën e Shqipërisë e cila s’ka buxhet, ku fëmijët e kopshteve dhe të çerdheve janë pa ushqim, dhe banorët pa shërbimet bazike”, tha Rira në një reagim për BW.

Në vijim, ajo shton se klika e PS me dy deputetët e zonës, Taulant Balla dhe Nurie Belba qëllimisht kanë bllokuar çdo përpjekje për miratimin e buxhetit 2019, duke paralizuar çdo shërbim ndaj banoreve. Për këtë duhet të fliste Rama dhe Balla sot, jo për andralla e agroturizëm.

“Në fakt, Rama dhe dy deputetët e tij erdhën sot në Rrajcë si “kofini pas të vjelave”, për një ujësjellës të njohur si “Gurrat e Zeza”, projekt i cili ka qenë prioritet dhe impenjimi im personal për banorët e Rrajcës, qysh në krye të mandatit tim!

Takimi dhe propaganda e radhës, ishte për të marrë meritat e bashkisë, e cila është bashkëfinancuese në këtë projekt 4 vjeçar, edhe pse këta që vinë e mburren sot ishin kundër projektit duke synuar pezullimin e tij me idenë se gjoja burimi është në zonën e mbrojtur të parkut të Shebenikut”, deklaroi Rira.