Nga Albert LOÇI
Demokratët e Lezhës besuan tek ju z.Basha!
Teksa Shqipëria është futur në një rrugë të vështirë për demokracinë e vendit,e ndjeva të nevojshme që të bëja këtë shkrim si një nga kandidatët për deputet nga lista e PD-së të qarkut Lezhë. Muajt e fundit politika shqiptare ka pasur zhvillime të rëndësishme, madje dhe me rastin e paprecedentë të djegies së mandateve nga ana e opozitës. Sigurisht që është një akt sakrifice për hir të një demokracie të munguar.
Por menjëherë pasi opozita la parlamentin, duke u shkëputur një herë e mire nga personat me preçedentë penale, nga bleresit e votave, nga të paarsimuarit, etj, një pjesë e kandidatëve të listave të opozitës pranuan të futeshin në atë parlament. Arsyet se përse pranuan të marrin mandatin në fakt as që i di dhe as që dua ti di në të vertetë. Para disa ditësh më erdhi një kërkesë nga KQZ për t’u bërë pjesë e parlamentit duke zënë kështu vendin e deputetëve që dhanë dorëheqjen.
Por kë do të përfaqësoja unë kur të gjithë demokratët janë më të bashkuar se kurrë me faktin se demokracia dhe liria në këtë vend ka vdekur me kohë dhe goditjen më të madhe ai institucion e mori kur vendosi kryetar parlameti persukutorin e 4 djemve të rinjë Shkodran në 2 prillin e 1991. Për hir të ish-të përndjekurve dhe ish-viktimave të atij sistemi asnjëri nga ne s’duhej të futej në atë parlament.
Po për çfarë të hyj unë si një i ri, për të përfaqësuar të rinjtë vallë? Të hysh që të rrish në një sallë me Kryeministrin që në 6 vite qeverisje largoi me mijëra të rinjë dhe vrau shpresën për pjesën tjetër që vazhdon të jetojë akoma në këtë vend. Apo me MB Sandër Lleshaj që në çdo protestë urdhëron arrestimin e protestuesve kryesisht të rinjtë duke i marrë zvarrë dhe dhunur fizikisht.
JO, FALEMINDERIT, por unë nuk pranoj të bëhem pjesë e këtij turpi! Por sigurisht gjej rastin të falenderoj dhe miqtë e mijë demokratë ku secili u tregua dinjitoz dhe i vendosur duke na bërë krenar te gjithëve në nivel qarku, faleminderit Aldo, Lindita, Andon, Preç, Martin, Luigj, Enkelejda dhe Klajti!
Edhe një herë treguam se demokratet e Lezhës janë të bashkuar dhe interesi i tyre është interesi qytetar para atij personal dhe funksionimi normal i institucioneve në nje shtet aspirant për të hyrë në BE.
