Kriza e rëndë politike, institucionale, ekonomike dhe sociale që po kalon Shqipëria ka tërhequr vëmendjen edhe të politikës italiane.

Pas reagimit të djeshëm të CDU/CSU në Gjermani, sot reagon Lucio Malan, zv/kryetar i grupit të senatorëve të Forza Italia.

Në reagimin e tij, Malan prek edhe deklaratat e kryeministrit Rama dhe eksponentetëve të tjerë të PS, të cilët paralajmëruar nisjen e procedurave për shkarkimin e presidentit Ilir Meta.

Ai i bën apel qeverisë së tij në Romë të reagojë lidhur me krizën që po kalon Shqipëria.

"Kriza e rëndë institucionale në Shqipëri, që vijon prej muajsh, arriti sot një nivel veçanërisht kritik. Kryeministri Edi Rama po kërkon të largojë nga posti presidentin e republikës, fajtor vetëm se ka kërkuar të ndërmjetësojë lidhur me datën e zgjedhjeve lokale, në të cilat partitë e opozitës kanë deklaruar se nuk do të marrin pjesë, për shkak se, pas parregullsive të shumta, të vërejtura në zgjedhjet e 2017-s, nuk është regjistruar kurrfarë përmirësimi.

Kriza ka mbërritur një nivel aq kritik sa lideri i Partisë Demokratike (anëtare e Partive Popullore Evropiane) Lulzim Basha, ka dorëzuar në shenjë proteste mandatin e deputetit, së bashku me të gjithë kolegët e partisë së tij.

Prej vitesh, Basha e akuzon Ramën për lidhjet e tij me bosët e drogës, të cilët e eksportojnë atë kryesisht në Itali, çka ka sjellë edhe interesimin e mjaft magjistratëve italianë. Shpresoj që Qeveria (italiane) të interesohet për gjendjen në këtë vend kaq pranë nesh, ku ndodhen tashmë edhe mjaft sipërmarrës italianë, të cilëve u nevojitet, para së gjithash, ligjshmëria”, thuhet në deklaratën e politikanit italian.