Nga Kejdi Mehmetaj, Nënkryetare e LSI-së/
Prej gati një jave jemi bërë të gjithë dëshmitarë të një histerie kolektive që ka kapur rilindjen dhe të paguarit e saj. Me shqetësim të thellë shqiptarët ndjekin çudirat që flasin e bëjnë ithtarët e Ramës në pseudo parlament, KQZ e pothuaj çdo institucion që e kanë zaptuar, duke mos qenë të bindur nëse këto çudira janë lajthitje, frikë, pasojë e temperaturave të larta apo angullimat e fundit të një shtaze që po jep shpirt.
E teksa turren kush e kush ti bëjë më tëpër fresk shefit në rënie, kukullat rilindase nuk gjejnë kohë të kuptojnë se veprimet që po kryejnë, së paku kanë shkaktuar neveri e urrejtje ndër njerëzit e thjeshtë e së shumti, kur më në fund drejtësia të çlirohet nga kthetrat që e mbajnë peng, do I nxjerrin ata përpara saj për shkelje të rënda të ligjit.
Këta trima që si papagaj përsëritin shefin e rrënuar, si nuk gjetën pak guxim t’u kërkojnë falje shqiptarëve për derexhenë në të cilën e kanë futur vendin.
Përshembull, të flasin për milionat e eurove që u zhdukën nga doganat e që bën edhe “Crown Agency” të fliste me vete.
Ose për “Toyota Yaris”, pyjet e zhveshur të Librazhdit, djemtë dhunues të politikanëve rilindas e pronat publike që uzurpuan dhe po ndërtojnë me banda.
Të flasin për dosjet 339, 184 dhe përgjimet që kanë bërë publike “Zëri I Amerikës” dhe “Bild-I” gjerman.
Të përgjigjen për ministrat e kryebashkiakët, shokë të ngushtë të Ramës, të lidhur me banditë e kriminelë nga Vlora e deri në Shkodër.
Të shpjegojnë pse ende nuk ka asnjë përgjegjës për aferën e “Unazës së Re” dhe falsifikimin e firmës së një shtetari amerikan.
Pse vendi ka një Prokurore të Përgjithshme të Përkohëshme antikushtetuese dhe pse prej kohësh nuk kemi Gjykatë Kushtetuese e Gjykatë të Lartë.
Të na shpjegojnë pse Shqipërisë rrezikon ti kthehet regjimi I vizave dhe pse ëndrra Europiane u gropos pas votës së Parlamentit Hollandez kundër çeljes së negociatave.
Shqiptarët e kanë kuptuar hallin që e mban rilndjen dhe kryerilindasin të shtrënguar fort pas pushtetit. Lëshimi I karrigeve nuk I lë ata vetëm pa punë, por u rrezikon lirinë dhe shpagimin për dëmet e paimagjinueshme që kanë kryer.
Aq të shumta janë skandalet e krimet që kanë ndjekur këtë qeveri, sa qytetarët as nuk habiten më. Madje, u duket vetja naiv kur përballen me rilindjen e kërkojnë sado pak përgjegjshmëri në qeverisje. Naivitet u duket edhe kur flasin me ta për varfërinë, arsimin, shëndetësinë, bujqësinë etj, sepse shefat e mëdhenj rilindas, janë të plotfuqishëm, të pasur, të fortë e të paarritshëm për qytetarët e thjeshtë.
Të vetmit të çmendur që synim të punës së tyre kanë ndarjen e popullit dhe nxitjen e konfliktit janë diktatorët dhe kriminelët. Me sa duket, Rama e ka ndarë mendjen ta pozicionojë veten si më të keqin ndër të dy kategoritë.
Në këtë moment të rëndësishëm për vendin, zgjidhja e krizës realizohet vetëm nëpërmjet rikthimit të shtetit të së drejtës, me institucione të pavarura që u shërbejnë qytetarëve, jo pushtetarëve. Mjaft më me përcartjet moniste e diktatoriale, është koha të punojmë për demokraci e demokracia vjen vetëm nëpërmjet proceseve zgjedhore pluraliste, të lira e të ndershme.
