Kjo e hënë që shënon dhe nisjen e një jave të re, pritet të jetë me zhvillime të vrullshme politike, pasi dita e zgjedhjeve lokale të 30 Qershorit, të ç’dekretuara nga presidenti Meta po afron.
Mazhoranca ka vendosur që në seancën e sotme plenare të miratojë paketën ligjore për forcimin e luftës kundër pastrimit të parave dhe financimit të terrorizmit. Socialistët e lidhin këtë me akuzat në drejtim të kryedemokratit Lulzim Basha, i cili po hetohet për një lobim që ka kryer në SHBA, i dyshuar për prapavijë ruse.
Nga ana tjetër gazeta gjermane Bild do të publikojë sot 16 përgjime të reja, që lidhen me krimet elektorale, që pritet të rëndojnë pozitat e qeverisë Rama, duke qenë se nxjerrin në dritë lidhjet e politikës me krimin.
E në mesin e këtyre zhvillimeve, kreu i grupit parlamentar në PS, Taulant Balla do të mbajë rreth orës 9 e 30 një konferencë urgjente në Kryesinë e Kuvendit, ndërsa ende nuk dihet se cila do të jetë tematika që ai do të trajtojë.
‘’Ju bej me dije se ne oren 9.30 te Kryesia e Kuvendit (salla e konferencave per shtyp) z. Taulant Balla, kryetar i Grupit Parlamentar te PS do kete nje konference urgjente per shtyp. Ftohet media ta ndjeke dhe pasqyroje me lidhje direkte”, njofton zyra e shtypit në Kuvend.
