Për ish-kreun e KQZ, Ilirjan Celibashi 30 qershori ishte një proces i ligjshëm, të paktën nga pikëpamja formale juridike. I ftuar në studion e emisionit “Kjo Javë” Celibashi komentoi edhe raportin e OSBE/ODIHR për 30 qershorin si edhe punën e KQZ-së në këtë proces, për të cilin theksoi se nuk është ndër ata për të cilët duhet të krenohemi.

“Votimet nëse do përdorim një koncept matematikor janë një bashkësi më e madhe që përfshin edhe zgjedhjet, sepse procesi zgjedhor zhvillohet nëpërmjet procesit të votimit në çdo rast. Por tej kësaj, bëj pjesë në grupin e atyre qoftë juristë por edhe të tjerë që e kanë parë 30 qershorin si një proces të ligjshëm të paktën nga pikëpamja formale juridike. Thënë këtë, nëse do mbetemi vetëm në këtë pikëvështrimi, mendoj se nga pikëpamja ligjore ky është një proces i ezauruar i konsumuar pastaj gjykimet e tjera të karakterit politik apo tjetër janë edhe ato të pranueshme, parë nga interesa apo pikëvështrime të ndryshme.” – u shpreh Celibashi ndërsa pohoi se kishte votuar më 30 qershor.

Sa i takon raportit të ODIHR, dhe kritikave të KQZ, Celibashi u shpreh duke parë situatën presioni politik dhe konfliktualiteti politik ka patur ndikimin e vet në veprimtarinë e KQZ-së.

“Duhet të pranojmë që situata në të cilën u zhvillua ky proces ishte më keq se normalja, dhe për KQZ do të ishte në çdo rast një situatë të tillë shumë e vështirë që procesi zgjedhor të administrohej në ato standarde të cilat do ta bënin këtë proces të pranuar nga të gjitha palët dhe për vëzhguesit ndërkombëtar. Presioni politik dhe konfliktualiteti politik ka patur ndikimin e vet në veprimtarinë e KQZ-së dhe KQZ-ja ata janë njerëz që jetojnë mes nesh edhe mund të ndikohen nga opinionet e gjithësecilit prej nesh ashtu edhe nga politika, nuk e shmang dot. KQZ në tërësi si trup, mendoj që duhet ta themi është përpjekur të bëjë atë që ka patur mundësi për të bërë. Nuk mund të bënte më shumë, dhe nuk mund t’i kërkohej më shumë, marrë në konsideratë edhe situatën politike, por edhe mënyrë se si është i kompozuar. KQZ ia doli që formalisht ta mbyllte atë si proces edhe pse formalisht akoma nuk është mbyllur.”

“ODIHR është një institucion i besueshëm për të gjithë spektrin politik dhe opinionin publik shqiptar. Raporti është ealist e ka fotografuar shumë mirë situatën në Shqipëri. Këto nuk janë zgjedhje për të cilat ne duhet të krenohemi dhe të themi që këto ishin zgjedhjet që i japin një notë pozivite procesit zgjedhor apo në përgjithësi procesit të integrimit.Por duke parë situatën si u zhvillua nuk mund të pritej e s’mund të bënte më shumë. ODIHR e sheh procesin në tërësi dhe për këtë mesiguri do të ketë kritika.” tha Celibashi ndërsa u shpreh se ndaj qytetarëve ka patur një presion ose autopresion ndaj tyre.

Ndër të tjera Celibashi komentoi edhe deklaratat e opozitës, sipas së cilës 85% e zgjedhësve refuzuan Ramën. Për këtë Celibashi u shpreh se korrekte është të thuash se 85% e zgjedhësve nuk kanë votuar, nuk kanë votuar se kanë qenë këtu, ose kanë qenë e s’kanë dashur të votojnë, pra është një bashkësi më e madhe.