sh-ministri i Jashtëm Ditmir Bushati ka nisur shkëputjen nga Edi Rama dhe krimi.

Edhe pse ka qenë i akuzuar për lidhje të forta me klanin Bajri në Shkodër, lëvizja e Bushatit tregon se tashmë ata i janë bashkuar Ramës dhe kandidatit të tij në Shkodër, Valdrin Pjetri.

Me një status në Facebook, Ditmir Bushati ka bërë thirrje që PS-ja duhet të shkëputet nga krimi, e ti bashkohet dijes, duke goditur Ramën dhe lidhjet e tij me mafian.

Siç duket, Ditmir Bushati ka vendosur që të nisë ‘katarsisin’ nga vetja e tij, për të pastruar PS-në, ose për të krijuar një alternativë të re politike të majtë, që do të rivalizojë Edi Ramën.

Ja çfarë shkruan Ditmir Bushati në Facebook:

Ismail Qemali në rrugëtimin e tij historik për mëvetësinë e Shqipërisë e shpjegonte në mënyrë elokuente fjalën ‘komb’, që në shqip do të thotë ‘nyje’. Një nyjë që të bëhet në fyt. Për shqiptarët e mi – thoshte plaku i urtë – përpara se të jetë një ide, një thelb historik, kombi është një nyje, një lëmsh që mblidhet në gjoks, që të shtrëngon, gati një dhimbje.

Kjo thënie e Ismail Qemalit të kujtohet sidomos kur sheh këtë Pasqyrë të gjendjes kulturore të vitit 1927, dëshmi e sakrificave për edukimin e kombit.

Në fakt, forcimi i identitetit kombëtar nëpërmjet arsimit, artit e kulturës kanë qenë në themel të projektit të rilindasve tanë që në fillim të shekullit XIX, për një Shqipëri të përparuar, pavarësisht prapambetjes së saj.

Kjo tablo e vitit 1927 është dëshmia e gjallë sesi qytetet që kanë mbajtur peshën kryesore në historinë e vendit janë po ashtu në krye të përpjekjes për rrugën e dijes. Një varg sakrificash të cilat duhet të na shërbejnë për reflektim dhe përulësi përballë historisë që i ka rezistuar me dinjitet shtrëngatave, herë prej kohës e herë prej njeriut.

Dija është antipodi më i qëndrueshëm i shoqërisë përballë krimit dhe fenomeneve negative. Dija mbetet tipari dallues i shoqërive europiane, ku ne do të shkojmë si komb duke mbajtur me vete amanetin e parardhësve dhe premtimin për pasardhësit. #BookLoversDay U.S. Embassy-Tirana