Shpalli kandidaturën për kreun e PS Durrës shkarkohet nga detyra.

Kjo i ka ndodhur Ardit Kërtushës, ish-kreut të FRESSH-it në Durrës, i cili mbante funksionin e Drejtorit Rajonal të Departamentit të Kontrollit dhe Rikuperimit Humbjeve në OSHEE-në e Durrësit.

Kërtusha ka shpallur kandidaturën për të marrë drejtimin e degës së PS në Durrës, duke sfiduar kreun aktual, Luan Zaza, një ndër drejtuesit me të jetëgjatë në krye të degës së PS-së, që pretendon sërish një mandat tjetër.

Vendimi i Kërtushës nuk është pritur mirë dhe ka nxjerrë në pah përplasjen e klaneve. Madje nga raportimet mësohet se përplasje ka edhe mes anëtarëve të kryesisë.

Ardit Kërtusha më herët ka qenë për 5 vite Drejtor i Këshillit Qarkut si dhe një mandat kryetar i FRESSH Durrës.
Zyrtarisht mësohet se nga 16 shtatori deri më 10 nëntor do të zhvillohen zgjedhjet për kryetarët dhe sekretarët e 324 organizatave socialiste në Durrës.

Burime zyrtare nga dega e PS-së shprehen se në një pjesë të organizatave mund të rikonfirmohen në detyrë kryetarët dhe sekretarët aktualë, në të tjera mund të zgjidhen emra të rinj, kjo edhe në varësi të punës dhe rezultateve të arritura nga secili prej tyre.
Pas përmbylljes së zgjedhjes së drejtuesve të organizatave deri në dhjetëditëshin e parë të nëntorit, fokusi do të përqendrohet tek gara për zgjedhjen e kryetarit të PS për bashkinë Durrës.

Kandidaturat do të propozohen nga organizatat socialiste dhe më pas emrat dërgohen në kryesinë e PS-së, ku bëhet përzgjedhja e kandidatëve potencialë dhe më pas procesi i votimit me parimin “një anëtar, një votë”. Deri në datë 7 dhjetor, PS-ja e Durrësit duhet të ketë zgjedhur kryetarin e saj.