Sekretari i Përgjithshëm i Partisë Demokratike, Gazmend Bardhi, tha nga Shkodra ku ndodhet në kuadër të procesit të zgjedhjeve të sekretariateve se, do të publikojë javën e ardhshme dokumente të tjera të cilat vërtetojnë akuzat e ngritura nga selia blu ndaj kryetarit të Bashkisë Vau Dejës, Mark Babani, i cili ka qënë i dënuar dhe dëbuar nga Italia dhe Maqedonia e Veriut.

“Edhe Valdrin Pjetri fillimisht e mohoi por më pas u detyrua të pranonte ajo që garantoj është që PD në momentin që bën denoncim publik ka arritur të sigurojë të gjithë informacionin e nevojshëm që vërteton denoncimin që bën. Nëse ai hesht siç ka heshtur gjatë orëve të pasdites unë do i përgjigjem me dokumentacionin përkatës në ditët në vijim. Nga e hena nëse Babani nuk do të flasë se çfarë i kujton data 4 prill 1994, ne do t’ia bejmë publike shqiptarëve këtë dhe dosjen e plotë që disponojmë për të”, tha Bardhi nga Shkodra.

Bardhi tha më tej se, opozita do të vazhdojë protestat duke kërkuar rrëzimin e qeverisë Rama. Ai tha se PD nuk synon mbylljen e derës së integrimit por plotësimin e kushteve nga ndërkombëtarët, ku në thelb janë zgjedhjet e lira dhe të ndershme.

Partia Demokratike i kërkoi më datën 10 shtator Prokurorisë së Përgjithshme verifikimin e Mark Babanit, kryetarit të Bashkisë së Vaut të Dejës, pasi sipas selisë blu, dyshohet se, ka fshehur arrestime, dënime dhe dëbime nga Italia dhe Maqedonia e Veriut.