Kryetari i Partisë Agrare Ambientaliste. Agron Duka, ka zhvilluar ditën e sotme një takim me fermerë dhe sipërmarrës në fushën e bimëve medicinale në Përrenjas, ku ka kritikuar edhe politikat diskriminuese të qeverisë Rama ndaj bujqësisë, si edhe për qëndrimin përcaktues të Bundestagut për hapjen e negociatave që nuk ofton vetëm zgjidhjen e krizës por edhe zgjedhje të parakohshme.

‘Në Prrenjas, me fermerë dhe sipërmarrës në fushën e bimëve medicinale. Një sektor me potencial të lartë punësimi për banorët e zonave rurale dhe një ‘eliksir’ i rëndësishëm për ekonominë tonë, i cili nuk po gjen orientimin dhe mbështetjen e nevojshme për t’u ngritur në nivelin e kërkuar nga tregjet botërore.

Kjo është një tjetër pasojë e shterimit të energjive qeverisëse, që pasqyrohet te rënia e rritjes ekonomike dhe kriza e prodhimit, sikurse kanë dëshmuar protestat e fermerëve dhe blegtorëve përgjatë gjithë këtij viti. Paaftësia për t’i dhënë zgjidhje problematikave, apo aftësia për t’i krijuar ato, tregojnë se jemi përballë një mazhorance pa të ardhme politike, e cila po prodhon vetëm kosto sociale dhe ekonomike, te cilat vetëm zgjedhjet e reja mund të ripërtërijnë.

Qëndrimi përcaktues i Bundestagut, nuk afron vetëm zgjidhjen e krizës, por edhe zgjedhjet e parakohshme, me anë të cilave do të triumfojnë edhe zgjidhjet ekonomike për bujqësinë dhe jo vetëm. Prandaj, po përgatitemi që të ofrojmë ekspertët më të mirë, njerëz që i kanë përkushtuar gjithë jetën bujqësisë, programim dhe vizionin për ta kthyer Partinë Agrare Ambientaliste në zërin e fortë për fermerët dhe blegtorët në zgjedhjet e ardhshme.’