Flamuri i Republikës së Kosovës dhe as i Forcave të Sigurisë së Kosovës nuk është vendosur në vendin ku janë vendosur flamujt e shteteve tjera që kanë ndihmuar Shqipërinë të tejkalojë situatën e pas tërmetit.

Kështu, Ministrja e Mbrojtjes Olta Xhacka, bashkë me Kryeministrin Edi Rama kanë nderuar delegacionet ushtarake dhe civile të shteteve tjera.

“Miqtë e vërtetë njihen në ditë të vështira dhe kurrë më shumë se këto ditë, kjo shprehje s’ka patur kaq shumë vlerë. Mbi 250 specialistë nga vende fqinje, mike e partnere na u gjendën pranë, që në orët e para të 26 Nëntorit.
Faleminderit secilit prej tyre, për kontributin dhe sakrificën gjatë operacioneve të kërkim shpëtimit. Një komb i tërë u është mirënjohës!”, shkroi Ministrja e Mbrojtjes.

Mirëpo, simboli i Republikës së Kosovës ka munguar në këtë aktivitet.

Ndërkohë, Kryetarja e Durrësit, Valbona Sako, dha dorëheqje pasi dha vlerësime pozitive se në tërmet pati vetëm 50 viktima.

Ajo dha dy deklarata kontradiktore. Në të parën tha se të prekurit nga tërmeti po dërgohen ne hotele me 5 yje, ku as për pushime s’kanë qenë ndonjëherë. Ndërsa, në deklaratën e dytë tha se ishte e kënaqur pse pati vetëm 50 viktima.

Tërmeti në Shqipëri përpos viktima ka lënë mbi 900 të plagosur, shtëpi e pallate të rrënuara. Si pasojë e kësaj, mijëra njerëz kanë mbetur pa kulm mbi kokë. Një pjesë e banorëve janë strehuar nëpër kampe, disa nëpër hotele e një pjesë tjetër janë akomoduar në Kosovë.

Në ndihmë të Shqipërisë, menjëherë pas tërmetit, ishin nisur ushtarë e policë të Kosovës, të cilët kishin shpëtuar disa jetë njerëzish.

Qeveria e Kosovës ka ndarë 500 mijë euro për Shqipërinë derisa biznesmeni Pacolli ka ndarë një milion euro të tjera.

Edhe biznese tjera kanë ndihmuar shqiptarët e Shqipërisë pas tërmetit që ndodhi në Thumanë dhe Durrës. /GazetaExpress