Nga Sali Berisha.

Sot qytetarët e Kosovës dhe mbarë kombi shqiptar festojnë 12-vjetorin e Pavarësisë së Kosovës.

Ata përulen me nderimin më të thellë para gjakut dhe sakrificave të dhjetëra mijëra bijve dhe bijave të Kosovës, që ranë në luftëra gjatë një shekulli që Kosova të mbetej e pamposhtur dhe të bëhej e lirë dhe e pavarur.

Sot, në këtë ditë ne nderojmë veprën e pavdekshme të arkitektit të Kosovës së pavarur, burrit mendjendritur të kombit tonë, Presidentit Ibrahim Rugova dhe komandantit legjendar Adem Jashari, nderojmë miqtë dhe partnerët tanë të Aleancës së Atlantikut të Veriut, që bënë të mundur çlirimin dhe pavarësinë e Kosovës nga regjimi barbar i Milosheviçit.

Në 12 vite pavarësi, Kosova ka njohur një zhvillim dhe progres të gjithanshëm, sa rrallë ndonjë vend tjetër në histori.

Viti që kaloi ishte për Kosovën një vit i vështirë, por përsëri ishte viti i triumfit të saj. Gjatë vitit që kaloi, ajo u përball me tradhtinë e hapur të trojkës famëzezë të Miladinit shqipfolës, Esad Toptanit të Ri dhe Baton Stanishiqit. Kosova u përball me tradhtinë e dytë të madhe të Tiranës zyrtare.

Por viti 2019 ishte përsëri viti i ngadhënjimit të saj. Ajo me guxim dhe mençuri arriti t’i shndërroje në plehra të historisë, projektet e Vuçiç dhe argatëve të tij shqipfolës të krijimit të Serbisë së Madhe nëpërmjet ndarjes dhe copëtimit të saj apo Jugosllavisë së Re me emër fals Minishengen. Me këto qëndrime, Kosova u dëshmua faktor kryesor paqeje dhe stabiliteti ne Ballkan.

Ndaj sot, le të urojmë përzemërsisht, në këtë ditë të madhe, Kosovën dhe mbarë qytetarët, autoritetet e saj: Gëzuar 12- vjetorin e Pavarësisë! Zoti e bekoftë Kosovën dhe kombin shqiptar!