Bundesliga duhet të presë ende për të marrë “dritën jeshile” nga qeveria, në mënyrë që të kthehet në fushë për të çuar deri në fund sezonin e ndërprerë nga pandemia e Covid-19. Nuk ka sjellë asnjë vendim takimi i sotëm i kancelares Angela Merkel me 16 ministrat e sporteve të Landeve.

Mediat gjermane citojnë shefin e dytë në stafin të kancelares. Helge Braun ka bërë të ditur se vendimi përfundimtar do të merret vetëm javën e ardhshme, kur priten të tjera masa lehtësuese. Kjo do të thotë, se me shumë mundësi do të shtyhet edhe data e mundëshme e rinisjes së Bundesligës, e caktuar rreth datës 18 maj. Me shumë mundësi, kampionati gjerman do të rinisë në fund të muajit të ardhshëm, megjithëse skuadrat stërviten prej javësh.