Ministri i Brendshëm, Sandër Lleshaj, i ftuar mbrëmjen e kësaj të marte në emisionin “Opinion”, u pyet edhe për hartimin e ligjit antiKÇK. Gazetari Spartak Koka e pyeti Ministrin se cilët janë ekspertët e jashtëm që e kanë hartuar këtë ligj dhe cili është buxheti i alokuar për të paguar këta ekspertë për hartimin e këtij ligji.

Spartak Koka: Është hartuar një ligj për OFL-në, keni dijeni kush janë ekspertët të cilët e kanë hartuar këtë ligj zoti Ministër?

Sandër Lleshaj: Di që kanë punuar shumë ekspertë.

Spartak Koka: Ekspertë të Ministrisë, të Kryeministrisë, apo edhe të jashtëm?

Sandër Lleshaj: Ekspertë të ndryshëm, kanë qenë nga gjithë ministritë, nga Ministria e Brendshme, Policia e Shtetit, Ministria e Drejtësisë, bashkëpunëtorë ndërkombëtarë, ekspertë ndërkombëtarë. Ligji e ka kaluar testin e vet.

Spartak Koka: Sa është buxheti që ka alokuar Kryeministria dhe Ministria e Brendshme për të paguar ekspertë privatë për hartimin e ligjit antiKÇK?

Sandër Lleshaj: Nuk kam të dhëna për pagesën, nuk besoj të ketë pasur pagesa për këtë punë.

Spartak Koka: Në dijeninë time dhe ftoj ta konfirmojmë së bashku një ditë tjetër, ose tani, janë paguar si këst i parë, 340 milionë lekë të vjetra, një kompanie ligjore të jashtme e cila ka asistuar në hartimin e këtij ligji dhe 66 milionë lekë të reja shkon vlera në total.

Sandër Lleshaj: Kur e ditke përse më pyet mua për këtë.

Spartak Koka: Unë po ju pyes për efekt transparence./tvklan.al