Nga Ilir NIKOLLA

E përdhosën edhe shtatoren e Indro Montanellit në Milano. I thonë se ishte racist e pedofil. Kjo fushatë protestash e revizionizmi historik imagjino ç’duhet të shkaktonte në Shqipëri, në rast se do të duhej të bënim bilancet e një partie që dy ditë më parë kremtoi 29 (79 në fakt) vjetorin e vet. Bustet e të vdekurve dhe bëmat e të gjallëve kanë material me bollëk.
Po nomenklatura jonë në pushtet ka rënë squkë, se s’do t’i zbulohet se është nga të rrallat që na i ka akaparuar dëmet edhe për 15-20 vitet e ardhshme, me koncesionet dhe borxhet e pamata që ka marrë. Të vetmet shenja revizionizmi patëm këto ditë me qendrimet e kundërta për Esat Pashë Toptanin dhe Selam Salarinë. 
Gabim! Të dyja figurat janë mirë në ato llogoret ku i ka lënë historia. Të tjera shtatore të gjalla duhen rrëzuar e të tjera fraksione politike terroriste 80-vjeçare duhen nxjerrë jashtë jetës publike. E kjo tronditje do të ishte veç kthim në normalitet i shoqërisë, e veç më tej, duhet të mendonim edhe për rishikimin e kontributeve historike të secilit. 
Por si shpesh këtë shekull, vala na vjen vonë...e prandaj edhe pritet të na vijë egër.