Përfaqësuesi i LSI-së pjesë e Opozitës së Bashkuar, në Këshillin Politik, Petrit Vasili në një prononcim për mediat pas përfundimit të mbledhjes tha se çështja e listave të hapura për PS ishin një farsë, që kishte të bënte drejtëpërdrejtë me heqjen e koalicioneve.

Teksa theksoi se listat e hapura u propozuan për të dëmtuar marrëveshjen e 5 Qershorit, Vasili u shpreh se qeveria kërkon që të ndryshojë në gjashtë ditë Kushtetutën, ndërsa gjashtë muaj u deshën vetëm për ndryshimin e Kodit Elektoral.

Vasili: PS qartësoi për opinionin publik që çështja e listave të hapura, zelli për të folur për to ishin thjeshtë një farsë, alibi që vjen erë të qelbur dhe kishte të bënte vetëm me heqjen e koalicioneve në Kushtetutën e Shqipërisë.

Meqë ka një zell të vazhdojmë përpara me listat e hapura. Jemi dakord që listat e mbyllura të bëhen të hapura, por pati “Jo” absolute dhe Gjiknuri propozoi që ne të mblidhnim 28 firma nga deputetë e Kuvendit për të depozituar nismën.

E gjithë kjo ishte një farsë për të ç’bërë e dëmtuar 5 qershorin. Opozita ka qenë e qartë në propozim. Rama erdhi në Këshillin Politik për të bërë farsën e radhës.

Një gjë është e qartë Kushtetutën duan ta ndryshojnë për 6 ditë kur 6 muaj na u deshëm për të ndryshuar kodin elektoral.