Në një kohë kur buxheti i shtetit ka pësuar goditje të forta nga kriza e thellë ekonomike për shkak të pandemisë së koronavirusit dhe tërmetit të 26 nëntorit, institucionet shtetërore vazhdojnë të shpërdorojnë paratë e taksapaguesve shqiptarë. News24 ka zbuluar një shkelje flagrante nga Autoriteti Rrugor Shqiptar me tenderin për rindërtimin e Rrugës së Porto Romanos në Durrës, saktësisht loti i tretë me një vlerë prej 670 milion lekësh, rreth 5,4 milion euro.

Nga 6 kompani pjesëmarrëse në garë Autoriteti Rrugor Shqiptar ka refuzuar 3 ofertat më të ulëta, “Vëllezërit Hysa” me ofertën 456 milion lekë, “Salillari” me ofertën 614 milion lekë dhe “K-AAV” me ofertën 631 milion lekë. Më pas steka e ARRSH ka ndaluar tek ofertat më të larta, ato pranë fondit limit, konkretisht tek kompania “4 A-M” e cila ka dhënë një çmim prej 642 milion lekësh rreth 5.1 milion euro, më pas janë listuar kompanitë “Bami” me 647 milion lekë dhe “Alb Building” me 649 milion lekë

Prej kohësh, gara në tenderat e ARRSH është kufizuar, pasi përmes disa skemave fiktive me pjesëmarrjet në tendera, kompani të lidhura me njëra tjetrën, apo shoqëri bija të krijuara prej tyre kalojnë në xhepat e tyre tenderat e majme të Autoritetit Rrugor Shqiptar. Në finale kjo nuk është thjesht një garë mes kompanive të rrugëve pasi në fund të fundit goditjen e pësojnë paratë publike.