Kryeministri Edi Rama, i shoqëruar dhe nga kreu i grupit parlamentar të PS-së, Taulant Balla, është pritur sot nga presidenti Ilir Meta, ku do të konsultohen për datën e zgjedhjeve. Si i zoti i shtëpisë, kreu i shtetit iu ka uruar dy zyrtarëve socialistë mirëseardhjen ndërsa i ka pyetur dhe se çfarë dëshironin që të pinin.

Në nisje të fjalës së tij Meta i ka shpjeguar rëndësinë e vendosjes së datës, ndërsa thekson se ky proces duhet të jetë gjithëpërfshirës.

“Unë mendova që të fillonim konsultimet për datën e zgjedhjeve, për natyrën që lejon Kushtetuta me qëllim për të ndihmuar në një proces sa më gjithëpërfshirës. Jo se ka ndonjë rëndësi vendimtare, por për të respektuar çdo ndjeshmëri apo dhe kalendarin e fetave, siç janë festat fetare. Në këtë drejtim do të isha i interesuar të dëgjoja mendim tuaj si përfaqësues i PS dhe maxhorancës. Ndonjë kafe, ndonjë çaj, çfarë dëshironi?!”, tha presidenti Ilir Meta në nisje të takimit me kryeministrin Edi Rama.

Takimi në fjalë zgjati 15 minuta, ndërsa kryeministri Rama nuk dha asnjë koment për mediat në dalje nga selia e Presidencës.