Lideri historik demokrat, Sali Berisha, e mbylli takimin e Elbasanit mes entuziazmit të jashtëzakonshëm. Edhe kjo Foltore u prit me shumë interes, ndërkohë që Berisha premtoi se partia do bashkohet dhe do hapet për të ardhur më shpejt në pushtet.

“Ne do bëjmë gjithçka të bashkojmë të gjithë demokratët. A e kemi të mundur plotësisht? U bashkuam dhe fituam.

Unë u them ju, me ata që u bashkuam, me të cilët kishim pasur vite me ndarje dhe kundërshti të thella, unë i ftova me zemër të hapur.

Pse i ftova? Ky udhëtimi ynë është një udhëtim ku secili bën një kontribut, vendos disa tulla në këtë mur, do të largohet, do të rikthehet, është vendimi i tij.

Me ata që erdhën, unë kam bashkëpunuar në mënyrë absolute pa asnjë dallim me ata që i kisha të pandarë.

Ndaj unë jam i vendosur që çdo kontributor në këtë parti, që ka ruajtur vlerat dhe normat që ndajmë dhe besojmë, të rikthehet dhe të vazhdojmë udhëtimin.

Sikundër jam i vendosur të bëj gjithçka për të sjellë flukse të reja, flukse të kualifikuara, të shkolluar mirë, që të ecim me shpejtësi.

Ne na duhet shpejtësia. Gjithmonë e kam pasur dhe e kam një problem që nuk më ndahet kurrë: ne jemi kohëhumbur si komb, ndaj duhet të kapim kohërat,” tha Berisha.

“Do krijojmë ekipin më të shkëlyer që kemi pasur ndonjëherë dhe do vijmë në pushtet,” theksoi Berisha, duke u shoqëruar me brohorima