Presidenti i Republikës Ilir Meta akuzoi Edi Ramën dhe Lulzim Bashën për prishjen e rakorduar të marrëveshjes së 5 Qershorit për zgjedhjet. Kreu i shtetit deklaroi se Lulzim Basha i ka dhënë dy mandate qeverisëse Edi Ramës. Presidenti theksoi se vendimi i Gjykatës Kushtetuese që ka marrë në shqyrtim shkarkimin e tij do të shkojë në Gjykatën Europiane. Meta shpalosi edhe planet e tij politike pas largimit nga detyra e kryetarit të shtetit.
Presidenti i Republikes Ilir Meta deklaroi gjatë emisionit Çim Peka Live se Lulzim Basha i ka dhënë dy mandate qeverisëse kryeministrit aktual Edi Rama.
"Edi Rama i ka marrë dy mandate nga Lulzim Basha, 2017, 2021. Ishte e programuar. Dy kompani izraelite bashkëpunonin për këtë rezultat", u shpreh Meta.
Meta akuzoi Edi Ramën dhe Lulzim Bashën për prishjen e dakordësuar të marrëveshjes së 5 qershorit për zgjedhjet dhe i ktheu përgjigje edhe përfshirjes së mundshme të deputetit Basha në vendimin e pritshëm të Gjykatës Kushtetuese që përfundoi shqyrtimin e kërkesës për shkarkimin e tij.
"Presidenti s'ka bërë dhunë, dhunën e bënë ata që prishën marrëveshjen e 5 Qershorit, Edi Rama dhe Lulzim Basha".
Presidenti i Republikes akuzoi kryeministrin Rama për deklarata fashiste dhe për një plan që synonte gjakderdhjen në vend.
"Deklaratat e Ramës, ne ju njohim mirë kush jeni ju, ua dimë mendimet tuaja, ky është fashizëm. Një president që bën sikur nuk i shikon këto, është bashkëpunëtor i fashizmit. Kishte plan për gjakderdhje. E parandaloi presidenti, për këtë do të flas kur të iki nga president".
Meta tha se pasuesi i tij në Presidencë do të vijë nga mazhoranca dhe shpalosi edhe planet e tij politike pas largimit nga detyra e kryetarit të shtetit.
"Më 24 korrik këtë institucion e merr PS. Do të qëndroj në detyrë në respekt të qytetarëve. Çfarë do bëjë, Meta? Do komunikoj me popullin e 2 marsit më 25 korrik ose më herët".
Presidenti Meta shprehu bindjen se pas 25 vitesh do të rikthehej sërish për një mandat të dytë si President i Republikës.
"Do jem prapë President pas 25 vitesh. Pastaj ambasador".
