Edhe pse dy kandidatët e opozitës për Bashkinë e Vorës janë humbës përballë kandidatit socialist Blerim Sheraj, i cili ishte shkëputur me gati 5 mijë vota nga vendi i dytë, rezultati i shpallur mbrëmjen e sotme për Vorën tregon një hendek të madh mes opozitës së Sali Berishës dhe asaj të Lulzim Bashës.
Rezultati flet vetë. 2598 vota për Lulzim Vranën e “Shtëpisë së Lirisë”, ndërsa 687 vota për Ymer Markun e PD-së. Diferenca në vota është 3.7 herë më e lartë në favor të kandidatit të Sali Berishës.
Edhe pse janë pesë bashki të tjera për të cilat pritet të dalë rezultati, kjo e para jep një mesazh të fortë. PD-ja zyrtare në Vorë mori formën e një partie në fund të koalicionit. Ndërsa koalicioni “Shtëpia e Lirisë” e Sali Berishës non-grata dhe LSI-së së rrudhur e konsumuar mori formën e partisë prijëse të opozitës.
Sa i përket rezultatit për pesë bashkitë e tjera, kreu i KQZ, Ilirjan Celibashi bëri me dije se nesër do të shpallen rezultatet për to