Presidenti Ilir Meta ka përshëndetur fillimin e furnizmit me gaz natyror të Europës Perëndimore përmes gazsjellësit TAP, i cili kalon në territorin shqiptar.

Kreu i shtetit e cilëson gazsjellësin TAP si investimi i huaj më strategjik për Shqipërinë, ndërsa thekson se tashmë Europa është më e pavarur nga gazi rus.

Deklarata
Përshëndes fillimin e furnizimit me gaz natyror të Europës Perëndimore përmes gazsjellësit TAP.

TAP është investimi i huaj më i rëndësishëm strategjik në Shqipëri, frut i bashkëpunimit të suksesshëm dhe strategjik ndërmjet Shqipërisë, partnerëve europianë dhe SHBA-ve me Qeverinë e Azerbajxhanit.

Përveç ndikimit të jashtëzakonshëm të këtij investimi madhor në zhvillimin ekonomik dhe social të vendit, veçanërisht në zonat e kalimit të gazsjellësit, ky projekt rriti ndjeshëm pavarësinë e Europës nga gazi rus.

Projekti TAP e përfshiu Shqipërinë në hartën e infrastrukturës energjetike strategjike europiane, veçanërisht e rëndësishme në këtë periudhë sfiduese ndaj arkitekturës së sigurisë europiane dhe euroatlantike!