Diplomati Agim Nesho komentoi në Edicionin e Pasdites me moderatoren Armela Ferko në Syri Tv dorëheqjen e Lulzim Bashës nga drejtimi i Partisë Demokratike. Nesho deklaroi se zgjedhjet e 6 marsit treguan se kush kishte mbështetje në PD.

Sipas diplomatit Basha është i larguar pasi humbi betejën politike dhe partia e tij nuk e besoi në aksionin politik të deritanishëm. Ndër të tjera ai tha se grupi i Bashës tashmë do që të negociojë në mënyrë të padrejtë me Komisionin e Rithemelimit dhe shtoi se gjithçka zgjidhet me votë.

Sakaq, diplomati Agim Nesho tha se të besuarit e Bashës janë shkak i krizës në PD dhe nuk duhet të vendosin kushte për të zgjidhur krizën në selinë blu.

"Mënyra si u pasua dorëheqja tregoi se nuk kishte një sinqeritet për vetë kushtet e vendosura dhe mënyrat si bashkimi mund të parashikohet me përjashtime. Nëse Rithemelimi kërkon të ngrihej në bazë të një morali të ri çështjet që kanë parashtruar është në plan më të lartë nga ajo që kërkon pjesa tjetër pasuese e zotit Basha. Duan të negociojnë në mënyrë të padrejtë, jo në themelin e votës së lirë, kërkojnë të negociojnë në kushtet për të bërë një presion.”-tha Nesho.

Diplomati tha se ende nuk ka një reflektim të plotë nga grupi i Lulzim Bashës ndërsa theksoi se Komisioni i Rithemelimit duhet të qëndrojë në pozicionin e vet pasi një ditë i gjithë procesi do të përfundojë në favor të tyre.

"Grupi i Rithemelimit të qëndrojë në pozicionin e vet, kjo i bën më të fortë. Një ditë ky proces do përfundojë në favorin e tyre. Ka nevojë që opozita të jetë prezente dhe të mos bëjë kompromis me pushtetin por të jetë garant për kërkesat e qytetarëve. Nuk po shikoj një reflektim nga grupi i Bashës, ky reflektim do dobësojë grupin e pasuesve të Bashës."-tha Nesho në Syri Tv.