Nga Alba Kepi - 14/04/2022
Sakrifica më e dhimbshme e demokratëve është se të besuam opozitën në 8 vite e në dorëzimin e sigurt të tre mandateve të një pushteti monopartiak. Dorëzove parlamentin, deputetët, ligjet, votën e çdo demokrati, që të mban ulur në atë kolltuk!
Dorëzove sakrificën, zemërimin mospajtimin, kundërshtinë e çdo demokrati ndaj një sistemi patronazhist që i përgjonte dhe fëmijët e mitur!
Dorëzove historinë tonë!
Dorëzove fushatën e zgjedhjeve elektorale të 25 prillit, e heshtur, e mefshët, kompromise e rezultatit të paracaktuar! Në kufijtë e pabesueshmërisë politike e intelektuale ajo që prisnim nga kjo fushatë e me atë ç'ka ti prodhove.
Dorëzove sakrificën jo vetëm të demokratëve por dhe të çdo shqiptari pa interes politik, që priste një ndryshim në këtë sistem gjithnjë e më mafioz e i heshtur në kodet e veprimit me popullit!
Dorëzove votën e diasporës e të gjithë shqiptarëve emigrantë që përtej Europës e oqeanit prisnin që Shqipëria të rigjente arsyen e një regjimi demokratik, pa arrogancë, gënjeshtra, mashtrimi e korrupsion.
Je bashkëfajtor i të gjitha akuzave që sot çuditërisht hedh me kaq agresivitet kundër qeverisë!
Ngjan më shumë me mllefin e një personi të lënë vetëm mes oqeanit të diplomacisë e gjolit të oborrit të kasolles prej kashte.
Si mund të të besojmë pas tradhtisë së çadrës, fushatës, parlamentit, ligjeve anti-demokratike që ia vendose mbi prehër monopushtetit të mafias politike e ekonomike që ka mbledh në një grusht sistemin e informacionit publik, ekonominë e pasuritë e kombit.
Akuzon për lojëra personale e politike kur loja më tragjike qe e juaja që luajti me sakrificën tonë, me energjinë, historinë e me amanetet e familjeve tona!
Ju retorizuat sot mbi të vërtetat para atij Parlamenti që kolltukun e more nga kjo sakrificë e demokraëve, po kush eshte vërteta juaj?
Çfarë i keni dhënë ju Partisë Demokratike, çfarë sakrifice keni bërë ju për Partinë Demokratike?
Një gjumë letargjik me haraç sakrificën tonë!
Lista deputetësh me tarafe personale!
E turpshme emrat pa asnjë kontribut partiak në listat e deputetëve, në këshillin e madh e në komitetet drejtuese të Partisë gjatë këtyre viteve.
Ju flisni për vizion?
Ju që dhatë dorëheqjen e sot po kërkoni telekamerat? Ju vazhdoni të minoni partinë duke bërë lojën e qelbur të çarjes, e shfryrjes nga frustimi egoist se të kanë lënë vetëm!
Ju flisni për çmime të larta në treg, në tregun që e favorizuat ju me mefshtësinë e aksionit opozitar pa vizion e qorr!
"Kur s'ke zgjidhje ofrohu popullit cirk", deklaruat sot para gazetarëve.
Cirk të vërtetë pamë e jetuam nga drejtimi mosdrejtues i opozitës në këto 8 vite.
Pjesa më argëtuese e cirkut është kur në tendë shfaqet kllouni, e ju sot si dikur në një tendë plot me sakrificë demokratësh, u transformuat në PALAÇO!