Kryetari i Partisë Demokratike, Sali Berisha ka reaguar pas deklaratave të Sergei Lavrovit se ‘Ballkani i Hapur’ është një projekt që mbështetet fort nga Rusia.

Berisha shkruan në Facebook se Gëbelsi i Vladimir Putinit, i ka dalë zot këtij projekti.

Reagimi i kreut të PD-së, Sali Berisha:

Gëbelsi i Vladimir Putinit, Lavrov i del zot Ballkanit të Hapur si projekt rus!

Pas ndalimit që i bëri Bullgaria, Maqedonia, Mali i Zi, avionit të tij për të fluturuar në hapësirën ajrore të këtyre vendeve për në Beograd, Gëbelsi i diktatorit gjakësor Putin ju deklaroi mediave serbe se, ai po shkonte në Beograd për projektin e Ballkanit të Hapur.

Të dashur miq, kjo provon se Edi Rama, vasal i Aleksandër Vuçiç me Ballkanin e Hapur kërkon të vendosi Shqipërinë vendin anëtar të NATO-s, nën hegjemoninë e Serbisë dhe influencën direkte të Rusisë.

Konkretisht Lavrov deklaroi per mediat serbe: “Natyrisht, ata që po i tërheqin fijet në Bruksel nuk e kanë dashur këtë, nuk kanë dashur që ne t'i shprehim mbështetjen tonë për Beogradin, ndër të tjera, projektin e Ballkanit të Hapur. Tashmë është e qartë për të gjithë se Brukseli, NATO dhe BE duan ta kthejnë Ballkanin në projektin e tyre të quajtur Ballkani i Mbyllur-tha ministri i Jashtëm rus.

Me këtë rast përshëndes përzemërsisht vendimet e qeverive të vendeve anëtare të NATO-s për ndalimin fluturimit të avionit te ministrit të Putinit në hapësirën e tyre ajrore dhe dënoj me forcën më të madhe aktin antikombëtar, anti europian të Edi Ramës, mbështetjen nga ana e tij te projektit ruso-serb të Ballkanit të Hapur.