Kryetarja e LSI Monika Kryemadhi ka reaguar në rrjete sociale në lidhje me konferencën anti-korrupsion që u mbajt ditën e sotme e ku i pranishëm ishte dhe kryeministri Edi Rama.

Kryemadhi me ironi thotë se edhe edhe Agim Kajmaku i Vorës do drejtonte një panel tek kjo konferencë nëse s'do ishte kapur në Itali me 20 kg kokainë.

Sipas Kryemadhit, të gjithë ata që janë në burg nga Rilindja, më parë kanë qenë 'kampionët' e kryeministrit.

Statusi i Kryemadhit
Edhe Kajmaku i Vorës do drejtonte një panel te kjo konferenca e qeverisë për korrupsionin, nëse nuk do e kishin arrestuar italianët. Patjetër, sepse të gjithë çfarë janë në burg sot nga Rilindja, më parë kanë qenë "kampionët" e kryeministrit.

Reformën në drejtësi e miratuam bashkarisht si klasë politike në vitin 2016, që lufta ndaj korrupsionit të ishte përherë ekskluzivisht fusha e veprimit, e një sistemi të pavarur nga politika, të pa ndikuar nga pushteti legjislativ dhe ai ekzekutiv. Ky i fundit, dmth qeveria, është edhe më i korruptuari!

Ndërkohë që punojësit civil të çuar me detyrim në takim dëgjuan fjalimin propagandistik të kryeministrit, i gjithë vendi pret me padurim forcën e veprimit të drejtësisë ndaj zyrtarëve të inceneratorëve: një skemë korrupsioni në bashkëpunim, e faktuar në letra dhe firma, që ka përfshirë kryeministrin, zyrën e tij, ministra, kryetar bashkie, biznese të vërtetë dhe fiktivë.

Korrupsion qeveritar ka, por duhen profesionistë të pavarur në drejtësi ta luftojnë atë!