Lajmi se tre liderët e nismës Ballkani i Hapur mund të bojkotojnë një samit të Bashkimit Europian me vendet e Ballkanit Perëndimor ka shkaktuar jo pak trazim.
Portali i Brukselit, EurActiv shkruan se Serbia, Shqipëria dhe Maqedonia e Veriut mund të bojkotojnë samitin. Agjencia shkruan se shanset që Shqipëria dhe Maqedonia e Veriut të marrin dritë jeshile për nisjen e negociatave janë shumë të pakëta.
EurActiv thekson se tre vendet janë pjesë e nismës së Ballkanit të Hapur. Kjo nismë cilësohet si një iniciativë serbe, thekson portali.
“Politikanët dhe shoqëria civile në rajon kanë ngritur shqetësime për përfshirjen e Serbisë dhe përpjekjet e saj të perceptuara për të qenë udhëheqëse de facto e nismës.
Kjo është përkeqësuar më tej që kur Rusia pushtoi Ukrainën pasi Serbia mbeti i vetmi vend në Europë, përveç Bjellorusisë, që nuk ka miratuar sanksionet e BE-së. Për më tepër, Vuçiç ka hezituar të dënojë plotësisht luftën dhe tubime të shumta pro-ruse janë mbajtur në Beograd.
Çështja e Serbisë dhe ndikimi i mundshëm rus në rajon u kthye në qendër të vëmendjes disa ditë para takimit të fundit të Open Balkan. Ministri i Jashtëm rus, Sergei Lavrov, u desh të anulonte vizitën e tij në Beograd pasi vendet e rajonit refuzuan të linin avionin e tij të kalonte në hapësirën e tyre ajrore.
Lavrov kritikoi veprimin dhe bëri disa komente që u perceptuan në favor të nismës së Ballkanit të Hapur, ndërsa ai i referohej BE-së si ‘e mbyllur’.
Kjo u pa në Shqipëri, Kosovë dhe Maqedoninë e Veriut si demonstrim i mbështetjes ruse për nismën e Ballkanit të Hapur. Gjithashtu janë ngritur shqetësime se nisma mund të përdoret për t’iu shmangur sanksioneve ruse në rajon”.