Gjatë vizitës së fundit si kreu i shtetit shqiptar, Presidenti Ilir Meta është takuar me Kryeministrin e Kosovës, Albin Kurti dhe kryetarin e Kuvendit Glauk Konjufca në Prishtinë. Presidenti Meta pas takimit me Kryeministrin Kurti theksoi pikëpamjet e përbashkëta për Procesin e Berlinit, si nisma e vetme rajonale gjithëpërfshirëse. Sa i përket takimit me kryeparlamentarin Konjufca, Presidenti Meta beri thirrje për liberalizimin e vizave për shtetin fqinj

Presidenti i Shqipërisë, Ilir Meta gjatë vizitës së tij në Kosovë ka zhvilluar takime me Kryeministrin Albin Kurti dhe kryetarin e Kuvendit të Kosovës, Glauk Konjufca.

Gjatë takimit me Kryeministrin Kurti, Presidenti Meta u ndal tek nevoja per forcimin e mëtejshëm të marrëdhënieve mes dy vendeve teksa theksoi se e vetmja nismë rajonale gjithëpërfshirëse është Procesi i Berlinit.

“Jetik realizimi i projekteve të përbashkëta që afrojnë edhe më shumë qytetarët tanë, si ndërtimi i hekurudhës Durrës-Prishtinë, me impakt në ekonominë e të dy vendeve dhe të rajonit, që do na bashkojnë më shumë dhe do ndalnin hemorragjinë demografike që na ka prekur. Nevojitet më shumë koordinim edhe në politikën e jashtme dhe rajonale, në përputhje me qëllimin e përbashkët për anëtarësim në Bashkimin Europian. Lidhur me bashkëpunimin rajonal, ndamë të njëjtin vlerësim në përkrahje vetëm të nismave gjithëpërfshirëse, sikurse Procesi i Berlinit”.

Në vijim të vizitës në Kosovë, Presidenti Meta zhvilloi një takim edhe me kreun e Kuvendit të Kosovës, Glauk Konjufca. Meta theksoi se Kosova ka hedhur themele të forta e të qëndrueshme të shtetndërtimit, e përkushtuar për funksionimin e demokracisë parlamentare, që respekton parimet e kontrollit dhe balancës së pushteteve, që synon sundimin e ligjit dhe luftën kundër korrupsionit.

“Shqipëria duhet të marrë shembull nga ushtrimi i demokracisë në Kosovë, në veçanti se si llogaridhënia qeverisëse sigurohet përmes institucionit më jetik të demokracisë përfaqësuese, që janë zgjedhjet e lira dhe të ndershme. Me rëndësi për forcimin e gjithanshëm të marrëdhënieve strategjike mes dy vendeve tona, konkretizimi me nisma ligjore të marrëveshjeve ndërqeveritare. Liberalizimi i vizave për qytetarët e Kosovës është një domosdoshmëri, që duhet të ndodhë sa më parë.”

Një ditë më parë zoti Meta zhvilloi një takim me homologen kosovare Vjosa Osmani si dhe mbajti një fjalim para deputetëve të Kuvendit të Kosovës. Kjo është vizita e fundit që Presidenti Meta zhvillon në cilësinë e Kryetarit të Shtetit