Ish-presidenti Ilir Meta ka folur për mediat pas Konventës Kombëtare të LSI e cila nga sot ndryshoi emrin në 'Partia e Lirisë', ku u caktua kryetar i Komiteti Organizator për drejtimin e partisë dhe përfaqësimit të saj në të gjitha nivelet.
Meta tha se “Liria dhe referendumi do qëndrojë si shpata e Demokleut mbi këtë klasë politike dhe që do çojë përpara dhe procesin e integrimit të vendit”.
I pyetur nëse do e takojë kreun e PD-së Sali Berisha, Meta tha se nga sot nis puna, duke paralajmëruar bashkëpunim të vazhdueshëm
“Nga sot nis puna, çdo ditë pa ndërprerje. Pas dy muajve do jetë konventa e ardhshme që do jetë një mesazh i jashtëzakonshëm i shpërthimit të energjive më vitale”, tha Ilir Meta.
Lëvizja Socialiste për Integrim zhvilloi këtë të hënë Konventën Kombëtare, një ditë pasi Ilir Meta dorëzoi detyrën e Presidentit të Republikës, duke iu rikthyer politikës aktive.
Konventa votoi unanimisht ndryshimet e reja në statut, përfshirë edhe ndryshimin e emrit nga LSI, në 'Partia e Lirisë'.
Monika Kryemadhi dha dorëheqjen vendim i cili u miratua nga Konventa.
Gjithashtu Konventa Kombëtare votoi zgjedhjen e Ilir Metës drejtues të Komitetit Organizator dhe të Agim Neshos si zëvendës së tij në këtë funksion.
Ilir Meta do të drejtojë 'Partinë e Lirisë' deri në zgjedhjet e reja që do të bëhen për kryetar partie