Kryetari i PD, Sali Berisha, gjatë takimit me intelektualë të fushave të ndryshme, foli edhe për autostradën Milot-Fier, pjesë e 'Korridorit Blu'.

Ish-kryeministri tha se një kilometër rrugë në këtë autostradë do të kushtojë, sipas tenderit të Edi Ramës, 22 milionë euro, rrugë lineare, në një kohë kur në Europë, standardi është 2 deri 3 milionë euro.

Berisha e cilësoi alarmant borxhin publik i cili ka arritur në 107%, duke e konsideruar si fundosës për vendin.

"Ky hap tender për autostradë 22 milionë euro për kilometër linear, në një kohë kur në Europë, me këtë terren, ndërtohen me 2 gjer 3 milionë euro. Pse e bën këtë? Sepse do të pasurohet edhe më shumë.

Sot, ky zotëri (Edi Rama), bashkë me mëkëmbësen e tij njoftuan shqiptarët se po hapim tenderin për Autostradën Blu, Milot-Fier, në një kohë kur borxhi publik është absolutisht fundosës për këtë vend dhe s’do të jetë e largët dita kur Greqia të duket lule, është 107%. Për sirenat që bien të varfërisë dhe mjerimit në votrat shqiptare. Ndjeshmëria e tij ndaj këtij realiteti është zero. Ai është i lumtur, e tha bukur profesori, ai jeton në lumturinë e tij, jeton në saraje, jeton me avion në dispozicion, jeton me çdo gjë, kurse se çfarë ndodh me qytetarët, ai nuk ka asnjë preokupim", tha më tej Berisha