Atë që e ka thënë ditë më parë presidenti i Malit të Zi, Milo Gjukanoviç, lidhur me iniciativën “Ballkani i Hapur” e ka thënë sot edhe politikania serbe nga Kosova, Rada Trajkoviç.

Ish-deputetja e Kuvendit të Kosovës, Rada Trajkoviç, tani kryetare e Lëvizjes Evropiane të Serbëve nga Kosova, ka thënë se aleanca Vuçiç-Rama-Abazoviç kanë për qëllim copëtimin e Malit të Zi.

“Qëllimi i aleancës Vuçiç-Rama-Abazoviç nuk është futja e Malit të Zi në Ballkanin e Hapur, por copëtimi i saj”, ka shkruar Trajkoviq, në një postim në Twitter, transmeton Telegrafi.

Ditë më parë vetë presidenti i Malit të Zi, Milo Gjukanoviç, ka thënë se projekti “Ballkani i Hapur” është “shumë kontrovers”, sepse është një skenar alternativ për të ardhmen e Ballkanit Perëndimor jashtë BE-së.

Madje ai ka vlerësuar se qëllimi i autorëve të idesë së “Ballkanit të Hapur” është zhdukja e Bosnjë-Hercegovinës, Malit të Zi, Kosovës dhe Maqedonisë së Veriut dhe shtoi se sigurisht që do të përfundonte me “luftë dhe me ndonjë gjenocid”.