Ministria e Jashtme e Bullgarisë ka reaguar ndaj deklaratave të kryeministrit Rama në forumin e “Bled-it” në Slloveni të zhvilluar dy ditë më parë, se Bullgaria bllokoi për 8 vite fillimin e negociatave të anëtarësimit të Shqipërisë në BE .

Në njoftimin zyrtar thuhet se kreu i qeverisë shqiptarë ka bërë sërish deklarata të paprovokuara antibullgare, duke i cilësuar ato si të papranueshme dhe të pahijshme të një kryeministri, vendi i të cilit është kandidat për anëtarësim në BE.

“Në lidhje me deklaratat e reja, të paprovokuara, të njëpasnjëshme antibullgare të kryeministrit shqiptar Edi Rama gjatë Forumit të Bled më 29-30 gusht të këtij viti, bazuar në deklaratën e rreme se Bullgaria bllokoi fillimin e negociatave të Shqipërisë për 8 vjet për anëtarësimin në BE. MPJ i refuzon me vendosmëri sugjerimet e tij si të papranueshme dhe të pahijshme për sjelljen e një kryeministri të një vendi kandidat për anëtarësim në BE”, thuhet në njoftimin zyrtar të ministrisë së Jashtme.

Për Bullgarinë deklaratat e Ramës janë retorikë antibullgare dhe qe jane kthyer në një refren të përhershëm të fjalimit të tij politik.

“Tani ajo është e kombinuar me një fokus anti-evropian dhe një përpjekje për të poshtëruar mekanizmat e procesit evropian. Deklaratat zbulojnë keqkuptime rreth kuptimit politik të procesit të vendosjes së marrëdhënieve në rajon në binarët evropianë. Natyrisht, bëhet fjalë ose për mungesë të aftësive komunikuese evropiane ose për një nxitje të qëllimshme të ndjenjave anti-evropiane. Bullgaria rezervon të drejtën të reagojë në mënyrën e duhur ndaj sjelljes së kryeministrit shqiptar, duke ndjekur parimet e së drejtës ndërkombëtare dhe evropiane”, mbyll reagimin ministria.