Analisti Andi Bushati ka komentuar vendimin e Prokurorisë për të ndaluar mediat të publikojnë të dhënat sekrete të nxjerra nga hakerat pasi kanë hyrë në e-mailet e ish-kreut të Policisë së Shtetit, Gledis Nano.
Gjatë një interviste në “Euronews Albania”, Bushati është shprehur se Prokuroria nuk mund ta bëjë këtë pasi nuk i takon autoriteteve shtetëtore, drejtësisë, prokurorisë mbi të gjitha, të bëjnë rregullimin e mediave.
Sipas Bushatit, janë mediat ato që vendosin, çdo gjë që është në interes të publikut, i duhet dhënë publikut, pavarësisht se herë pas herë mund të duket sikur bie në kontradiktë me arsyen shtetërore, me interesat e qeverive.
Ndër të tjera, Bushati shprehet se banditët më të mëdhenj të këtij vendi lëvizin të lirë, pasi i lejon policia.
“Nuk i takon autoriteteve shtetërore, drejtësisë, prokurorisë mbi të gjitha, të bëjnë rregullimin e mediave. Janë mediat ato që vendosin, çdo gjë që është në interes të publikut, i duhet dhënë publikut, pavarësisht se herë pas herë mund të duket sikur bie në kontradiktë me arsyen shtetërore, me interesat e qeverive.
Kjo që unë po them është e vlefshme për raste shumë më flagrante sesa ky i tanishmi. Unë nuk e kuptoj se çfarë sekreti ka për një gjë që e dinë të gjithë. Banditët më të mëdhenj të këtij vendi, policia e di ku janë dhe i lejon të bredhin mes kryeqytetit të lirë”, theksoi ai.
