Kryetari demokrat, Sali Berisha, tha se pavarësisht se në shesh kanë dalë të dhëna shumë të rëndësishme dhe jetike për Shqipërinë dhe shqiptarët, askush nuk është dënuar sepse drejtësia është vegël e PS-së.

“Unë e kam të qartë se hakerat iranianë sulmuan portalin e-Albania dhe unë e besoj raportin e publikuar, por absolutisht, të dhënat faktojnë se ata nuk janë të vetëm, se të dhënat digjitale të Shqipërisë u shkatërruan nga kombinime, hakerash, rajonalë, europianë, por edhe striktë qeveritarë.

Imagjinoni për një moment, një proces që ka filluar në vitin 2017-18 me publikimin e të gjitha të dhënave për oficerët e SHISH, që përbënte një dekonspirim të sekreteve njëkohësisht edhe të NATO, proces që u vazhdua me dorëzimin e të dhënave personale të 1 mln shqiptarëve tek patronazhistët e PS. Proces që u vazhdua me publikimin e rrogave dhe targave.

A ka njeri sot në një proces të vetëm gjyqësor për të gjithë këtë veprimtari e cila ishte absolutisht, mirëfilltas qeveritare. Qoftë rrogat, targat, të dhënat personale të qytetarëve në PS, u dërguan nga agjentë të qeverisë dhe me urdhër të kreut të saj.

A ka një të ndaluar, të arrestuar për të gjithë këtë shembje, rrokullisje të infrastrukturës digjitale të vendit? Asnjeri, sepse drejtësia është e tëra një vegël, e partisë shtet dhe zbaton vetëm urdhrat e saj,” tha Berisha.