Sekretari i Përgjithshëm i Partisë së Lirisë, Tedi Blushi, ka pasqyruar rastin e ndjekjes penale për një 64-vjeçar nga Vlora i cili ka ndërtuar një çati me llamarina.

Përmes një postimi në facebook, Blushi, nënvizon se për llamarina pa la leje policia të arreston, ndërkohë që të pasurit favorizohen të ndërtojnë kate pa leje në mes të Tiranës, të cilat më pas dhe u legalizohen.

Ai shton se shteti po degradon çdo ditë në një regjim hajdut, i cili do të shembet shumë shpejt përpara vullnetit të popullit.

“Në Vlorë arrestohet 64-vjeçari për llamarina pa leje (çati me teneqe), në Tiranë falen oligarkët për kate, pallate dhe kulla pa leje.

Ky është standardi i dyfishtë dhe modeli qeverisës shtypës i Edi Ramës: Ndëshkim, arrestim dhe burg për më të dobëtit. Favorizim, legalizim dhe liri për më të pasurit!

Ky shtet që po degradon përditë në një regjim hajdut dhe shtypës do të shembet përpara vullnetit të qytetarëve të lirë” shkruan Blushi në facebook.