Në kohën kur qeveria shqiptare flet për luftë dhe për krizë që nuk e ka njohur historia, Shqipëria po përjeton një situatë paradoksale.

Korporata Elektroenergjetike Shqiptare po vazhdon që të blejë energji, ndërkohë që vendi po përmbytet. KESH po shkarkon miliona metër kub ujë nga portat, teksa blen energji me çmime marramendëse.

Vetëm për periudhën nga 14 deri në 20 nëntor, u blenë plot 42 mijë megavat në orë, me një çmim prej 228 eurosh për megavat. Por ndërkohë që janë shpenzuar të paktën 9.7 milionë euro për blerje, shkarkimet vazhdojnë.

Ndërkohë, në muajin tetor, KESH importoi 74 mijë megavat në orë, me një çmim të çmendur prej 455 eurosh për megavat, ose rreth 261 euro më shumë se çmimi i tregut.

Kulmi arrin me procedurën e fundit, që njihet edhe si procedura e optimizimit, ku energjia blihet me 216 dhe 213 euro për megavat dhe shitet me... 204 dhe 202 euro për megavat.

Burimet e SYRI TV thonë se këto tendera po menaxhohen nga Ener Trade, një kompani që ka bërë abuzime të shumta me tenderat e KESH.

Aksionerë të kësaj kompanie janë Artur Micka dhe Marin Gjonaj, dy njerëz të rilindjes. Micka është anëtar i FRESSH dhe drejtor drejtorie në qeveri.

Kurse Marin Gjinaj është i akuzuar nga Policia e Durrësit dhe i shpallur në kërkim për shkelje me prodhimin e Bitcoin në vend. Kjo dosje e tij u mbyll në mënyrë të dyshimtë.