Përpara fituesve të primareve të PD-së, kryetari demokrat, Sali Beisha, tha se ata janë misionarë për të çliruar vendin nga hajdutët e rilindjes.

“Bashkitë po presin me padurim çlirimin nga kjo farë hajdutësh që nuk i ka parë toka.

Ai që sot është në krye të bashkisë së Tiranës, nuk po flas për Durrësin se aty është një figurinë, kurse ligjin e bën nëntoka, nuk po flas për Elbasanin, se atë shkojnë dhe e rrahin në zyrë. Por po ndalem te Tirana se atje janë cilin të qash më parë.

Ka një kontratë për mbetjet, sipas të cilës kompanisë vetë, për çdo ton mbetjesh, duhet t’i paguajë taksapaguesi i Tiranës 11 euro për depozitim dhe 28 euro për djegie. Ka 5 vite që nuk është djegur një kg pleh, por secili kg i tyre i ka kushtuar taksapaguesve shqiptarë, 28 euro. Po kaq edhe taksapaguesve të Durrësit, se janë aksionerë.

Mafia e plehrave ka në krye Edi Ramën,” tha Berisha.

“Ju kaluat një garë, një betejë për të hyrë në luftë. Një luftë elektorale. Në një betejë elektorale, me qëllimin më madhor, për t’ia rikthyer bashkitë qytetarëve shqiptarë. Ne ua rikthyem anëtarëve dhe simpatizantëve të PD-së, përfaqësuesit e tyre dhe ja ku jeni.

Ju jeni misionarë. Për të rikthyer bashkitë te qytetari. Ju filloni garën si misionarë, që bashkitë të shndërrohen siç duhet të jenë, në shtëpitë e vërteta të qytetarëve. Ju nisni një betejë me misionin e madh, jo vetëm për largimin e barrës së rëndë që sekti i rilindjes ka hedhur mbi shpatullat e qytetarëve shqiptarë,” tha Berisha.