Gazetari i njohur shqiptaro-amerikan, Peter Lucas, që ka punuar për disa nga mediat më të njohura dhe prestigjioze në zonën e Bostonit dhe jo vetëm, ka dhënë një intervistë interesante për Alfred Lelën.

Në intervistën e publikuar nga portali Politiko, Lucas flet për marrëdhëniet e tij me Sali Berishën dhe tregon se si ka dalë kundër vendimit të SHBA për shpalljen e tij ‘non grata’.

Por Lucas tregon edhe detaje interesante për kryeministrin aktual, Edi Rama.

“Fola me Tomas Meninon, kryetar i bashkisë së Bostonit, i cili me ndërhyrjen time pranoi ta priste Ramën, dhe gjithashtu të binjakëzonte Bostonin me Tiranën. I thashë Ramës se i kisha rregulluar një takim në x ditë dhe orë, por ai më tha se do të shkonte në Kaliforni për një foto me Hillary Clinton-in, asokohe senatore”, tregon Lucas.

“U habita nga ky vendim,” shton Lucas duke arsyetuar se binjakëzimi i Tiranës me Bostonin do të sillte më shumë për qytetin se sa një foto e krybashkiakut me senatoren amerikane.

Gazetari i njohur bën një konstatim interesant edhe për kryebashkiakun e Tiranës, Erion Veliaj, pas konstatimit të tij për ndërtimet e shumta në qytet dhe dyshimet se bëhet fjalë për pastrim parash në industrinë e ndërtimit.

“A është kryebashkiak i njëjti Veliaj që ka qenë edhe me “Mjaft”? pyet ai.

“Di të them se Veliaj është rasti tipik i politikanit që bën të gjitha gjërat, të cilave ai vetë ka thënë se është kundër,” konstaton Lucas.