Këshilltari i lartë në Departamentin Amerikan të Shtetit, Derek Chollet, ka folur për tensionet në veri të Kosovës, pas barrikadimit të pikave kufitare nga serbët lokal të veriut.
Chollet tha se edhe pas shtensionimit të situatës, veriu ka vakum sigurie teksa theksoi se situata është shqetësuese.
“Në Veri ka vakum sigurie. Është shqetësuese situata. Nuk duam të shpenzojmë kohë për menaxhim të krizave. Situata ka qenë e vështirë në dhjetor, sidomos gjatë periudhës së Krishtlindjes”, deklaroi tutje Chollet në takimin me gazetarët kosovarë në Prishtinë.
Chollet po ashtu ka deklaruar se është urgjent krijimi i Asociacionit të Komunave me shumicë serbe, duke shtuar se SHBA-ja nuk mbështet aranzhmane që nuk janë në përputhje me Gjykatën Kushtetuese të Kosovës, apo me vendimet e saj.
Sipas tij, është urgjente që Kosova të përfshihet në dialog, i cili është i përqendruar në njohjen reciproke, pra mbështetur në atë që Presidenti Biden ka theksuar në letrën e tij, se dialogu duhet të përqendrohet në njohjen reciproke mes dy vendeve.