Kryetari demokrat, Sali Berisha, tha se Shqipëria do të marshojë në Tiranë për protestën më të madhe dhe më të fuqishme në vend. Ai tha se Shqipëria po zien pas skandalit të fundit të kryeministrit Edi Rama.

“Do të njoftohet data e protestës dhe do të organizohet protesta më e fuqishme. Shqipëria do marshojë në Tiranë, Tirana do derdhet në shesh.

Nuk ka shqiptar që mund të pranojë një kryeministër si ky. S’ka shqiptar që mund të pranojë një kryeministër si ky, që i korrupton vendit partner një nga 2-3 njerëzit kryesorë të sigurisë së tyre. Një kryeministër që paguan e përdor këta njerëz si lidhje për të dhënë goditje të rëndë opozitës. Shqiptarët, jam i bindur, që nuk do ia falin kurrë Ramës.

Skenari do jetë një protestë e qëndrueshme deri në rrëzimin e Edi Ramës. Nis lëvizja finale për rrëzimin e Edi Ramës. Kjo opozitë, ka për mision përmbysjen e këtij regjimi, nuk mund të pranojmë më tutje ne, një kryeministër që ka kryer një akt të përmasave të turpit botëror,” tha Berisha.

“Me Ramën nuk ka zgjedhje, Rama meriton largimin e menjëhershëm dhe procedimin penal. Një armik i Kushtetutës. Rama, e them me bindjen më absolute, nuk mund të mos i them kur shoh se ka përdorur asete ruse kundër opozitës. Kam thënë se PD nuk merr pushtet tjetër përvecvse me zgjedhje, por Rama duhet të japë dorëheqjen një minutë e më parë. Edi Rama është një kriminel ndërkombëtar. Ka kryer një akt të rëndë kundër vendit të tij dhe partnerit kryesor strategjik të Shqipërisë”, shtoi kryedemokrati.

Berisha reagoi edhe ndaj lajmit se mazhoranca në Kuvend ka vendosur ta përjashtojë për 10 dite nga punimet. Berisha u shpreh se të enjten do të jetë duke përgatitur protestën më të fuqishme që Tirana ka njohur ndonjëherë.

“Java që vjen do të jetë java e veprimtarisë intensive të Sali Berishës. Parlamenti i Lindës dhe i Ramës është parlamenti i turpit në historinë e vendit. Ndaj dhe do të ketë një veprimtari intensive dhe e garantoj që beteja do të zhvillohet në çdo skaj të Tiranës, në çdo sallë. Të enjten jam në përgatitje të protestës më të fuqishme që Tirana ka njohur. Kjo është veprimtaria e Sali Berishës”, tha Berisha.

“Tani kalohet në fazën përfundimtare, në protestën e qëndrueshme deri në rrëzimin e Ramës. Se kur do jetë, do vendoset në forumet e partisë, me aleatët”.