Kompania në fjalë quhet Gogël.

Dikush mund të mendojë se bëhet fjalë për diçka të vogël, ashtu si edhe vetë emri.

Por jo, Gogla e Arbër Veliajt është një kompani që rritet me shpejtësi, thuajse në mënyrë progresive me përparimin në politikë të vëllait.

Ky i fundit nuk është as më shumë dhe as më pak, por kryebashkiaku i Tiranës, Erion Veliaj, një njeri me fuqi të jashtëzakonshme në tregun mediatik.

Veliaj i reklamave është njeriu që me kompaninë e tij menaxhon tregun e publicitetit në faqet online, duke u ‘kujdesur’ kështu për aspektin më të rëndësishëm të kontrollit mediatik në emër të vëllait.

Kompanitë e mëdha, por edhe oligarkët e vendit ia kanë kaluar ‘goglës’ së vëllait të Veliajt shumicën e reklamave të tregut online, që jo vetëm po rritet me shpejtësi, por në kushtet e sotme ka një rëndësi shumë të madhe.

Nuk janë të pakta kompanitë që shprehen se e dinë që portale si Syri.net, që sipas të gjithë vlerësuesve, monitoruesve dhe indikatorëve ndërkombëtarë, rezulton faqja e parë në vend, por ngrenë duart lart duke thënë se reklamat i shpërndan Arbër Veliaj dhe ai vendos se çfarë duhet të bëjë.

Kjo mënyrë e të ‘larit të duarve’ të kujton rastin e kunatit të Lulzim Bashës, kur ky i fundit ishte shef i opozitës.

Edhe Landmark-u i Erion Isufit kishte një fuqi mbresëlënëse si Gogla e Veliajt. Edhe ai menaxhonte reklamat e oligarkëve dhe kompanive të mëdha, si një mënyrë e përzgjedhur nga pushteti për t’i mbyllur gojën Bashës.

Të gjithë e dinë se në historinë e postkomunizmit në Shqipëri, nuk ka pasur periudhë kur media dhe pushteti janë kontrolluar me dorë kaq të hekurt.

Fakti më i dukshëm është te tregu i reklamave, që në çdo vend normal ka një rëndësi jetike për mediat.

Goglat e pushtetit janë treguesi më i dukshëm i kësaj situate skandaloze, por edhe të frikshme për demokracinë dhe lirinë!